ABŞ xəbərdarlıq edib: Nüvə silahları süni intellektin nəzarətində olmamalıdır!

ABŞ-ın yüksək rütbəli rəsmisi Çin və Rusiyaya xəbərdarlıq edib ki, nüvə silahının yerləşdirilməsi ilə bağlı qərarlar heç vaxt süni intellekt tərəfindən deyil, yalnız insanlar tərəfindən verilməlidir. Belə ki, ABŞ Dövlət Departamentinin Silahlara Nəzarət üzrə rəsmisi Paul Dean-in sözlərinə görə, Vaşinqton insanların nüvə silahları üzərində tam nəzarətə malik olması ilə bağlı açıq öhdəlik götürüb. Nəticədə isə Fransa və Britaniya da bununla razılaşıb. Dean, Çin və Rusiya Federasiyasından da oxşar bəyanat gözlədiklərini əlavə edib.

Paul Dean, Birləşmiş Millətlər Təşkilatının Təhlükəsizlik Şurasının beş daimi üzvünə istinad edərək, “Biz bunun son dərəcə mühüm davranış nümunəsi olduğunu düşünürük” deyə bildirib. Onun bəyanatı, ABŞ prezidenti Joe Biden-in administrasiyasının Çinlə həm nüvə silahı siyasəti, həm də süni intellektin inkişafı ilə bağlı danışıqları sürətləndirdiyi bir vaxtda verilib. ABŞ dövlət katibi Antony Blinken və Çinin xarici işlər naziri Wang Yi, yaxın həftələrdə süni intellektlə bağlı ilk görüşü keçirəcək. Blinken, texnologiyanı əhatə edən risklərin və təhlükəsizliyin ən yaxşı şəkildə idarə olunmasına dair fikirlərini bölüşəcəklərini söyləyib.

Hərbi kommunikasiyaların normallaşdırılması çərçivəsində ABŞ və Çin rəsmiləri yanvar ayında nüvə silahı danışıqlarını bərpa ediblər, lakin silahlara nəzarət üzrə rəsmi danışıqların tezliklə baş tutacağı gözlənilmir. Ümumiyyətlə, nüvə silahları Yer planeti üçün böyük bir təhlükə hesab olunur. Bu silahların hər hansı müharibədə və ya münaqişədə istifadə olunması böyük fəsadlara eləcə də insan itkisinə yol aça bilər.

ABŞ xəbərdarlıq edib: Nüvə silahları süni intellektin nəzarətində olmamalıdır! xəbəri ilk olaraq Tedroid saytında yayımlanmışdır. Əsl mənbə bu saytdır.